طرق التعامل مع الاشخاص شديدي الحساسية

قد تكون الحياة مرهقة للغاية بالنسبة لك كشخص شديد الحساسية، وقد تؤثر على صحتك العقلية وعلاقاتك وطريقة تفاعلك مع العالم من حولك.

لكن يمكنك تحسين وضعك من خلال تعديل بيئتك، ومنح نفسك الوقت لإعادة شحن طاقتك، وممارسة الرعاية الذاتية وإدارة التوتر.

كل هذه الأمور يمكن أن تساعدك في إدارة حياتك بشكل أفضل. اليوم، سنشارك معك 7 نصائح للتعامل مع كونك شخصًا شديد الحساسية.

من هو الشخص شديد الحساسية؟

هو شخص يمتلك حساسية مفرطة تجاه المثيرات المحيطة به، وعادة ما يكون لديه استجابة أعمق للمؤثرات الجسدية أو العاطفية أو الاجتماعية.

يُوصف هؤلاء الأشخاص بأنهم “حساسون للغاية”، وتعتبر هذه الصفة جزءًا من شخصيتهم وليست اضطرابًا. قد تتداخل الحساسية المفرطة مع بعض الحالات الصحية مثل:

1- اضطراب فرط الحركة ونقص الانتباه.

2- اضطراب القلق العام.

3- اضطراب طيف التوحد.

4- اضطراب الوسواس القهري.

5- اضطراب المعالجة الحسية.

الشخص شديد الحساسية هو شخص بيحس بالعواطف والاحساسيس بشكل اكتر كثافة ، وبيميل انه يكون اكتر تعاطف وحساسية للاحاسيس الجسدية ، وغالبا بيحتاج وقت لاعادة شحن نفسه ، لو بتحسي انك دايما بتحسي بعمق اكبر من الشخص العادي وبتستجيبي بشكل اكتر كثافة للمثيرات حواليكي ، فدي علامة انك شخص شديد الحساسية.

علامات تقولك انك شخص شديد الحساسية:
1- الاحساس بمستويات عالية من التعاطف والمشاعر الشديدة تجاه الاخرين ، والشعور بألم الاخرين وحزنهم.

2- الشعور بالارهاق بسهولة بسبب المحفزات الحسية زي الزحمة, الاضواء القوية, الملابس غير المريحة.

3- بتحسي بمشاعر سلبية وايجابية بشكل اكتر كثافة.

4- بتحسي بتأثر شديد بالفن والموسيقى.

5- تجنب البرامج او الافلام العنيفة لانها بتكون شديدة جدا بالنسبة لك.

6- بتحتاجي لوقت فراغ لاعادة شحن طاقتك ، خصوصا بعد الايام اللي عملتي فيها حاجات كتير ، بتحتاجي تنسحبي لاوضة ضلمة وهادية.

7- وجود افكار عميقة ومعقدة ومعاها مشاعر قوية.

8- الشعور بالتوتر والارهاق بسبب تعدد المهام.

9- انك تكوني حساسة جدا للكافيين.

10- بتواجهي صعوبة في اتخاذ القرارات السريعة ، او العمل تحت ضغط ، او التفكير السريع.

7 طرق للتعامل للشخص شديد الحساسية:
1- اتعرفي على محفزاتك:
مهم انك تكوني عارفة ايه اللي بيسبب لك اكبر قدر من التوتر عشان تبقي مستعدة للمحفزات دي او تتجنبيها ، انتبهي لاحساسك طول اليوم ، الحاجات الل بتخليكي كويسة وحاسه بالرضا والحاجات اللي بتخليكي تحسي بشعور سيء ، وهيكون مفيد انك تبدأي في تدوين مشاعرك في دفتر يوميات ، ممكن تلاحظي انك شديدة الحساسية للاخبار ، او بتكرهي تبقي موجودة في مكان زحمة ، او في اشخاص معينة بيستنزفوا طاقتك ، بمجرد ما تتعرفي على اكبر مسببات التوتر ليكي ، تقدري تتخلصي منها او على الاقل تبقي اقوى لمواجهتها ، فهم نفسك يعتبر جزء اساسي من التعامل مع حساسيتك الزيادة.

2- اعطاء الاولوية للعناية الذاتية:
باعتبارك شخص شديد الحساسية ، احتمال كبير جدا انك تتأثري بقلة النوم وسوء التغذية والارهاق ، وده معناه انه مهم جدا انك تهتمي بنفسك ، اتأكدي انك بتنامي بشكل كافي ، اكل وجبات صحية ، العناية بعقلك وجسدك بحاجات زي ممارسة الرياضة والتأمل ، وكل ما مارستي العناية الذاتية ، هتقدري تتعاملي بشكل افضل مع اي حاجة تيجي في طريقك.

3- ادي نفسك الوقت الكافي لاعادة شحن طاقتك:
ممكن تلاقي نفسك انك محتاجة لوقت اكتر للاسترخاء واعادة شحن طاقتك مقارنة بالاشخاص العاديين ، خليكي صادقة مع نفسك ، وكمان مع عيلتك واصحابك ، بخصوص مقدار الحاجات اللي تقدري تعمليها وامتى محتاجة للراحة ، لو كان يومك مليان ، اتأكدي بعدها من تخصيص وقت لنفسك ، واتأكدي انك تحطي وقت فراغ بين المهام ، ماتحطيش خطط كتير في اجازات نهاية الاسبوع او بعد الشغل ، وادي وقت لنفسك تكوني لوحدك لاعادة شحن طاقتك ، ماتخافيش انك تقولي “لا” للحاجات اللي انتي عارفة انها هتستنزف طاقتك.

4- اختاري دايرتك بحكمة:
الاشخاص الحساسين بزيادة بيحسوا بمشاعر اللي حواليهم ومش بيحبوا يخذلوا حد ، وكمان معرضين اكتر للتوتر ، وده بيخلي من المهم انك تحيطي نفسك بأشخاص بيفهموكي ويخلوكي ماتحسيش بشعور سيء ، حاولي بأقصى جهد عندك انك تخلي علاقاتك القريبة منك تكون خالية من الصراعات قدر الامكان ، وابعدي عن الشخصيات السامة ، ابني شبكة داعمة من الاصحاب ووفري طاقتك ودعمك للعلاقات اللي بتحقق لك السلام النفسي.

5- اعملي حاجات ايجابية:
ضيفي البهجة لحياتك من خلال التأكد من وجود حاجات ايجابية في جدولك ، ممكن تروحي في تمشية طويلة مع حد من اصحابك ، او تحضري كورس او اي دورة تعليمية تحبيها زي صناعة الفخار, الرسم ، او تطبخي طبخة لذيذة ليكي ولشريكك ، خلق الايجابية في حياتك هيساعدك في عزلك عن مسببات التوتر ، مهم كمان انك تتعلمي تقولي “لا” للطلبات والحاجات اللي مش بتحسسك بالسعادة ، ممكن تقولي لا لخروجة ، حفلة ، او اي بيئة فيها زحمة بتسبب لك التوتر.

6- انجاز المهام خلال ساعات الراحة:
لتجنب الزحمة والدوشة والتحفيز اللي بيجيلك منها ، اعملي مهامك خارج جدول الشخص العادي ، يعني اعملي حاجتك في الاوقات غير المعتادة للاشخاص العاديين ، يعني مثلا اعملي شوبينج بعد العشا, مارسي المشي الصبح بدري ، اعملي مهامك خلال الاسبوع لما تقدري ، من خلال جدولة حياتك بالطريقة دي ، هيقل احتمال تعرضك للتحفيز المفرط ، وتقدري تستمتعي بأسلوب حياة اكتر استرخاء.

7- مارسي تقنيات ادارة الاجهاد:
لان الاشخاص الحساسين زيادة ممكن يصابوا بسهولة بالارهاق بسبب الاجهاد ، هيكون مهم دمج تقنيات ادارة الاجهاد في حياتك ، اتعرفي على المناسب ليكي اكتر ، سواء كان ممارسة الرياضة, التأمل, تدوين مذكراتك, او الفضفضة مع حد قريب منك ، حتى ممارسة تمارين التنفس هتكون مفيدة جدا في المواقف الصعبة او اللي بتسبب لك توتر ، عشان تعملي تمرين التنفس ، استنشقي لمدة 4 ثواني واحبسي انفاسك لمدة 4 ثوني وخرجي الزفير لمدة 4 ثواني وارجعي احبسي نفسك تاني لمدة 4 ثواني ، كرري العملية لحد ما تحسي انك بقيتي اهدا.الحياة كشخص شديد الحساسية ممكن تبقى مرهقة في بعض الاحيان ، ولكن دمج استراتيجيات التأقلم دي في روتينك اليومي هيساعدك تعيشي حياة اقل ارهاق.