«الركوب مجانا للزملكاوية فقط» مشجع يخصص سيارته بالبحيرة لجماهير الزمالك : بعشق مرتضى منصور

قرر المواطن احمد حموده، ابن مدينة دمنهور بـ محافظة البحيرة، مشجع لنادي الزمالك، تخصيص سيارته السرفيس لركوب جماهير نادي الزمالك بالمجان دون تقاضيه أجرة، وكتب على زجاج سيارته من الخلف لافتة : “الركوب مجاناً للزملكاوية فقط”.

و قال مشجع الزمالك لـ «البحيرة اليوم » : انا من دمنهور بلد النور، أحيكم يا أجمل وأعظم جمهور في الكون، جمهور الزمالك العظيم، اللي بتشرف إن أنا منهم، دي هديتي في السنة الجديدة، أركب معايا ومتدفعش فلوس، روحت أي مكان أنت عايزه، في أي محافظة هعملك تصريح وهجيلك هناك، دي أقل حاجة أعملها لجمهور الزمالك”.

وتابع: “أنا حاصل على بكالوريوس زراعة جامعة الأزهر، ومليش شغلة تانية غير الشغلانة دي، عشان بحب جمهور الزمالك اللي أنا منهم، يشرفني إن أي واحد زملكاوي يركب معايا، يعرفني بنفسه وفي الحالة دي مبخدش أجرة، رغم أن أغلب الزملكاوية بيصروا على دفع الأجرة، لكن أنا أيضاً بّصر على موقفي ومبخدش فلوس، الفكرة دي مش وليدة النهاردة، أنا بعملها من زمان، لما ألاقي واحد لابس تيشرت الزمالك أو حظاظة أو بيقولي إنه زملكاوي، دي أقل حاجة أعملها لجمهور الزمالك، لأنه جمهور عاني كتير، مخدش إلا 14 دوري في 100 سنة، ناس ياما واقفة ضده، بيهدوا الكيان ومستحمل، أقسم بالله لو جمهور غير جمهور الزمالك كان انقرض، زي جمهور الترسانة وأندية تانية كتير، عشان كدة بحاول أعمله أي حاجة ولو في إيدي أكتر من كدة هعمل، بس الظروف مبتسمحش بأكتر من كدة”.

وأضاف: “إحنا كزملكاوية بنحب بعضنا، عمرنا ما أهانا بعضنا وعمرنا ما قولنا كلام وحش على بعض، معانا رئيس نادي مرتضى منصور قوي وبيعملنا اللي إحنا عايزينه، المستشار لما مشي بقينا نشحت على العلن”.

وعن طريقة تعرفه على جماهير الزمالك، قال حمودة: “أسهل حاجة إنك تعرف جمهور الزمالك، زي إنه يكون لابس تيشرت أو حظاظه أو بعرف من حسابه على الفيس بوك أو كلامه في الكورة، ولو ضحك عليا يبقى يكفي إنه باع انتمائه للأهلي عشان 2 جنيه ونص، وده بردو هيفرحني، في كل الحالات أنا كسبان”.

وأتم: “أنا بشكر الجماهير العظيمة، 95% من التعليقات إيجابية، قالولي كلام يبكي، لكن فيه 5% اللي بيمثلوا الأهلي، شتموني مش عارف ليه، إزاي تشتم على العلن وممكن زوجتك أو أولادك يشوفوا ده؟ أنت قبل ما تهني بتهين نفسك وجماهير الأهلي وكيان الأهلي، فيه ناس هددني في التعليقات، محامي كان بيقول هنرفع عليك قضية ونختص المرور والموقف لإثارة التعصب، فين إثارة التعصب في كدة؟، واحد تاني بيقولي هنكسرلك الزجاج، ليه التعليقات دي وليه التعصب؟ أنا مالي ومال الأهلي مجبتش سيرة الأهلي في حاجة عشان تجيلي تهديدات بالشكل ده”.
ad